Aprelniñ 7-nde saba yañı koronavirus hastaları qayd etilmedi, dep bildire Rusiye kontrolindeki Aqyar ükümeti.
«Bugünki künde yuqunç hastahanesinde 25 insan buluna. 1340 insan yaşağan yerinde közetüv altında qala. Yılnıñ başından 4952 insan közetüvde edi, karantin müddeti bitkeninen 3612 insan közetüvden çıqarıldı», – dep aytıla haberde.
Aprelniñ 6-nda Aqyarda 1800 insan koronavirus telükesi sebebinden közetüv altında qala edi.
Aqyarda qayd etilgen COVID-19 hastalarınıñ sayısı 5 oldı.
Qırımda aprelniñ 7-nde daa bir koronavirus hastası qayd etildi. Hasta Moskvadan kelgen Qırım sakinidir. Böylece, Qırımda 22 yañı koronavirus hastası bar, 18-i ketirildi, dördü eki qorantadan yerli ola.
Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
