Noyabrniñ 3-nde Aqyarda tutıp esir etilgen 22 yaşındaki Farhad Saliyev ve 33 yaşındaki Server Aliyevni RF FSB-siniñ maşnasınen bellisiz tarafqa alıp ketkenler. Bunı "Qırım birdemligi" cemaat birleşmesine Soliyevniñ anası Lena Seydaliyeva haber etti.
Seydaliyevanıñ sözlerine köre, oña adamnıñ tutıp esir etilmesi ile bağlı cinayet davasınıñ açılması aqqında haber etkenler, tahqiqatnıñ ketişatı aqqında ise iç bir malümat bermey ekenler.
"LizaAlert" qıdıruv hızmetiniñ göñüllileri RF İç işler nazirligine Lenara Seydaliyevanıñ oğlu ve onıñ zenaatdaşınıñ bulunğan yeri aqqında belli olğanı içün qıdıruvnı toqtatqanlar.
Advokatlarnıñ bildirgenine köre, açıq menbalarda Farhad Soliyev ve Server Aliyevge qarşı davalar açılğanı aqqında malümat yoq eken. Muvaqqat tutuv izolâtorlarında ve penitentsiar müessiselerde de olar yoqlar.
Adise yüz bergeninden dört kün soñra, noyabrniñ 7-nde, Lenara Seydaliyeva Qırım ve Aqyar boyunca RF FSB idaresine muracaat etken. Em yazıla, em onlayn şekilde bergen arizasına cevap olmağan.
"Bütün toplanğan malümat oğlum FSB hadimleri tarafından tutulğanını köstere. Oğluma qarşı qanunsız areketler etilgeninden, iskencelerge oğratılğanından qorqam", - dep ayttı Seydaliyeva.
Keçende "Qırım birdemligi" Aqyarda kimligi belli olmağan insanlar 22 yaşında Farhad Soliyevni hırsızladı, dep haber etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
