İlhaq etilgen Aqyarda saat 8:00 rusiyeli şeer parlamenti saylavları icün saylav bölükleri açıldı, dep bildire Aqyarnıñ rusiyeli saylav komitetiniñ malümatına esaslanıp "Krıminform" haber agentligi.
Beyanatqa köre, umumen 180 saylav bölügi açıldı, olar saat 20:00 qadar çalışacaq. Saylavlarda altısaylav cedveli boyunca namzetler ve 54 bir mandatlı namzet iştirak ete. Aqyarda saylavlar içün episi olıp 637 biñ billüten azırladılar.
Matbuat, saylav komitetine esaslanıp, bildirgenine köre, parlament saylavlarında LDPR, Pensiyalılar partiyası, RFKP, "Adaletli Rusiye" ("Spravedlivaya Rossiya"), "Rusiye Kommunistleri", "Yedinaya Rossiya" ("Yekâne Rusiye") partiyalarıiştirak etecek. "Velikoye Oteçestvo" ("Ulu Vatan"), "Partiya dela" ("İş partiyası"), "Rusiye veteranları partiyası", "Rodina" ("Vatan") ve "Zelönıye" ("Yeşiller") partiyalarına saylavlarda iştirak etmege izin bermediler.
Bundan ğayrı, sentâbr 8-inde ilhaq etilgen Qırımda yarımadanıñ rusiyeli parlamentine ve yerli şuralarına rusiyeli saylavlar keçe.
Rusiye akimiyeti, Qırım ve Aqyarda Qırım parlamenti ve yerli şuralarnıñ saylavlarını 2019 senesi sentâbr 8-inde keçire. Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.
Daa evel Ukraina mebusı, "Avropa birdemligi" partiyasınıñ daa bir reisi İrına Geraşçenko, Ukrainanıñ Yuqarı Radasını, rusiyeli saylavlarnıñ neticelerini qabul etmemege çağırttı.
