Aqyarda sentâbrniñ 22-nde Rusiye Qara deñiz flotunıñ ştab binası bayağı zarar kördi. Bu raketa ücüminiñ neticesi oldı, dep bildirdi Rusiye kontrolindeki yerli akimiyeti. Bundan evel Rusiye Qara deñiz flotunıñ komandalıq merkezine ücüm etildi. Neler oldı ve Rusiyeniñ Ukrayınağa qarşı büyük istilâsı çerçivesinde emiyeti ne, Qırım.Aqiqat maqalesinde tarif etemiz.

Aqyarnıñ merkezinde kündüz üç küçlü patlav oldı. Şaatlar patlav dalğasından penjere camları sallandı, dep haber ete.

Rusiye ve Qırım saifeleri raketa ücümi neticesinde Rusiye Qara deñiz flotunıñ ştabı zarar kördi, dep bildirdiler.

Rusiyeniñ Ukrayınağa qarşı büyük istilâsı başlağanından berli ştabqa ekinci kere ücüm etile. İlk sefer flot ştabı Aqyarda 2022 senesi iyül ayında uçucısızlarnıñ ücümine oğrağan edi.

Parçaları yüz metrlerge sıçradı

Videoda ava telükesi signalı eşitile. Yerli sakinler daa evel avadan ücüm vaqtında şeerde sirena yoq edi, dep qayd ete.

TASS Rusiye agentliginiñ malümatına köre, Qara deñiz flotunıñ ştabına qarşı raketa ücüminden soñ parçaları yüz metrlerge tüşti. Bir danesi Lunaçarskiy Aqyar rus drama teatri yanında tüşti.

Şeerde «Acele yardım» maşinalarınıñ sirenaları eşitildi.

Aqyarnıñ Rusiye yolbaşçısı Mihail Razvojayev raketa darbesi aqqında bildirip, Rusiye Qara deñiz flotuna tekrar ücüm etile bile, dep tenbiledi. Soñra raketa ve aviatsiya telükesi bitti dedi ve şeer merkezine ketmemege çağırdı.

Başta Rusiye akimiyeti darbe neticesinde vatandaş obyektleri zarar körmedi ve insanlar yaralanmadı, dep bildirdi. Amma soñra ştabnen qomşu olğan doquz evde pencere camları qırıldı, dep bildirdi. Anda darbe aqibetleri yoq etilgenine qadar ulaşuv söndürildi.

Telegram kanalları Rusiye Qara deñiz flotunıñ ştabına qarşı darbeniñ aqibetlerini derc ete. Videoğa köre, ştab binası viran etildi.

«Ştab yanında – bir qaç saattan berli tuman»

Kündüz polis patlav yerini sarıp, yanından keçkenlerden şeerniñ merkeziy soqaqlarını terk etmege rica etti.

«Şeerniñ merkezi qapatıldı, cemaat naqliyatı ve maşinalar aylanıp keteler. Merkezde keçkenlerden yaqınlaşmamağa rica eteler. Bir qaç saattan berli tuman bar – de beyaz, de qara. Qara deñiz flotunıñ ştabı tarafına yanğın maşinaları ve «acele yardım» maşinaları ketmege devam ete. Flot ştabına yaqın mesken evlerde ve merkeziy bayırda ışıq, gaz ve suv söndürildi», – dep bildire Qırım.Aqiqat mühbiri.

Onıñ aytqanına köre, Rusiye uquq qoruyıcıları ücüm yerinde cep telefonlarını «qullanmamağa rica ete».

Hatırlatamız, Rusiye akimiyeti qırımlılarnı Rusiye arbiy obyektlerine qarşı ücüm aqibetlerini aydınlatqanı sebebinden taqipnen qorquza.

Rusiye Mudafaa nazirliginiñ malümatına köre, raketa ücümi vaqtında ava mudafaa quvetleri beş raketanı urıp tüşürdi.

Bu malümatnı diger menbalardan tasdıqlamaq imkânsız ola.

«Devamı olacaq, dep vade etken edik»

Ukrayına Silâlı quvetleri Aqyarda Rusiye Federatsiyasınıñ Qara deñiz flotu ştabına qarşı ücüm etilgenini resmiy şekilde tasdıqladı.

Bundan evel Ukrayına Silâlı quvetleriniñ komandanı Mıkola Oleşçuk Telegram kanalında ukrayınalı uçucılarğa teşekkür bildirdi.

«Devamı olacaq, dep vade etken edik. «Bütün raketalar tüşürildi!». Ümüt etem ki, kelecek sefer Rusiye ava mudafaası kene fayda ketirir. Aqyar – Ukrayına Silâlı quvetleri Arbiy deñiz quvetleriniñ şeeri», – dep bildirdi o.

Aqyardaki Qara deñiz flotunıñ ştabına qarşı yapılğan darbeden evel Ukrayına Silâlı quvetleri Aqyarnıñ Nahimov rayonındaki Duvanköy (Verhnesadovoye) köyünde Rusiye Qara deñiz flotunıñ komandanlıq merkezine muvafaqiyetnen ücüm etildi, dep bildirdi. Ukrayına Silâlı quvetleri Baş komandanınıñ Strategik bağlar apparatınıñ idaresinde tafsilâtlar berilmey.

«Ukrayına telükesizlik hızmeti arbiy bölükte Rusiye flotunıñ komandanları olğanını tasdıqlağan soñ darbe endirildi. Tek duşmannıñ arbiyleri degil, paalı arbiy sistemalar da zarar kördi», – dep bildirdi «Ukrayınska pravda» neşiri Ukrayına telükesizlik hızmetindeki menbalarına esaslanıp.

«Zabitler içmege azırlana edi»

Rusiye Qara deñiz flotunıñ ştabında ve komandanlıq merkezinde patlavlar arasında bağ bar, dep tüşüne «Strategiya XXI» Ukrayına Globalistika merkeziniñ arbiy programmalar reberi Pavlo Lakiyçuk.

«Ukrayına Silâlı quvetleri Rusiye arbiy nişanlarına ücüm etmek içün başta «koridornı» Rusiye ava mudafaasından temizledi, şimdi ise arbiy uçaq alanı, cebe arqası obyektleri ve idare organlarına darbe endirdi. Duvanköydeki komandanlıq merkezi – Aqyar kirişinde yerastı obyekt, amma kene de ücümge oğradı. Keçken sene uçucısızlar Qara deñiz flotunıñ ştabına uçıp kelgende Rusiye arbiyleri Duvanköyge keçti. Şimdi qayda qaçacaqlar? Tek bir obyekt bar – Alsu dağında yedek komandanlıq merkezi (Balıqlavağa yaqın dağlarda – QA). Uzun tiller bir vaqıtları bu yer özek bombasına bile dayana, dep aytqan edi. Şimdi zabitlerniñ bunı teşkermek içün imkânlar bar», – dep bildirdi o, Qırım.Aqiqatqa.

Ekspertniñ aytqanına köre, sentâbrniñ 22-nde Aqyardaki Rusiye Qara deñiz flotuna qarşı ücüm Ukrayınağa qarşı yapılğan uruş areketlerinde qullanılğan Rusiye ordusınıñ farqlı çeşitleri arasında idare ve koordinatsiya sistemasını boza bile.

«Flot ştabı – em aviatsiya, em piyade, em ordu korpusı, em arbiy gemiler, em tamir bazasını bağlağan pek büyük bir qurulış. O, malümat toplay, arbiy operatsiyalarnı planlaştıra, esas faaliyetni idare ete ve komandanlıq merkezi ola. Duşmannıñ idare sisteması bozulsa, bu yahşı bir netice. Bu sistema bir vaqıt devamında faydasız olacaq, bütün elementleri oñartılmalı, çünki yaralanğan, maneviyatı bozulğan ya da öldürilgenler bar. Bir kişi öldürildi, dep haber etildi, amma bugün 22-si, cuma, hatırlatayım. Rusiye Qara deñiz flotunıñ aylıq künüdir. Darbe vaqtında zabitler ştabta ananeviy cuma içkisine azırlanğandır. Kelgen «acele yardım» maşinalarınıñ sayısına baqsaq, «yahşı uçıp keldi», – dep qayd etti Pavlo Lakiyçuk.

Onıñ fikirince, Rusiye Qara deñiz flotunıñ ştabına qarşı darbeniñ şeer merkezinde alev-alev yanğanını körgen Aqyar sakinleri içün «büyük psihologik tesiri bar».

Kelecekte Rusiye Qara deñiz flotunıñ eki variantı bar: göñülli ya da mecburiy yoq oluv, dep bildirdi Ukrayına milliy telükesizlik ve mudafaa şurasınıñ kâtibi Oleksiy Danılov.

O, Aqyar ve civarlarınıñ «mulk-köy hocalıq kompleksiniñ bütünligini saqlap qalmaq içün» Rusiye gemileriniñ «göñülli batması» eñ yahşı ve telükesiz yol olacaq, dep ayttı.

Aks alda Rusiye Qara deñiz flotu Ukrayına Silâlı quvetleriniñ tam darbelerinen «parça-parça kesilecek».

Sentâbrniñ 22-nde aqşam Aqyarda daa bir patlav eşitildi.

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.