Martnıñ 22-nde saba Rusiye Qara deñiz flotuna deñiz dronlarınen ücüm etildi, dep bildirdi Aqyarnıñ Rusiye yolbaşçısı Mihail Razvojayev.
Onıñ bildirgenine köre, flot deñizustü uçucısızlarnıñ ücümini keri qaytardı.
«Umumen bu saatqa qadar üç obyekt yoq etildi. Olar körfezge kirmege tırıştı, deñizcilerimiz atıcı silâdan ateş açtı. Ava mudafaası da çalıştı. Arbiy gemiler zarar körmedi», – dep aytıla Razvojayevniñ Telegram haberinde.
Lenin soq., 2 binalarında, Moskva evinde camlar qırıldı. Razvojayev «insanlar zarar körmedi», dep yaza.
Qırım.Aqiqat mühbiriniñ malümatına köre, Aqyarda saba küçlü patlavlar eşitildi. Deñiz yolcu naqliyatı işini toqtattı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
