Aqyarda saat 04:46-da şeerniñ merkeziy qısmında küçlü bir patlav eşitildi, pencere camları sarsındı, dep bildire Qırım.Aqiqat mühbiri.
Onıñ aytqanına köre, patlavdan evel ne uçqan raketa, ne de silâdan açılğan ateş sesi yoq edi.
Rusiye tarafdarı bloger Aleksandr Talipov sesli patlavlar şeerde saat 4:36-da, soñra 4:46-da, soñra 5:00-te ve 5:40-ta oldı, dep bildirdi.
Onıñ malümatına köre, Aqyar körfezi kirişinde bon qoraları çalıştı, neticede deñiz dronı toqtatılğan ve yoq etilgen eken.
Rusiye «Yol-naqliyat infrastrukturasınıñ inkişaf müdirligi» deñiz yolcu naqliyatı işini toqtattı, dep bildirdi.
Aqyarnıñ Rusiye akimiyeti ya da Rusiye arbiyleri şimdilik resmiy bir izaat bermedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
