Aqyarnıñ Rusiye akimiyeti Rusiye Federatsiyasınıñ Qara deñiz flotuna suv üstü uçucısızlar ücüm etti, dep bildirdi. Yerli sakinler Streletskaya körfezinde ve Rusiye arbiy bölükleri civarlarında patlav seslerini eşitti. Aqyarda bu ilk adise degil: baar başlağanından berli Rusiye akimiyeti qabul etken üçünci ücüm oldı. Aqyarda ne oldı ve yaqın vaqıtta Rusiye Federatsiyasınıñ Qara deñiz flotunı ne bekley, Qırım.Aqiqat maqalesinde tarif etemiz.

2022 senesi yazdan berli Rusiye akimiyeti yarımadada muntazam bir sürette dronlarnı qayd ete. Eñ çoq olarnı Aqyarda ve civarlarında, Rusiye arbiy obyektleri çoq olğan yerlerde köreler.

Aprelniñ 24-ne keçer gecesi, saat 3:30-larda, Aqyarda eki patlav oldı, dep haber ete Qırım.Aqiqat mühbirleri. Patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitildi. Zenit topu ve atıcı silâ ateşleri de eşitildi.

Rusiye Telegram kanallarınıñ malümatına köre, patlavlar merkezden üç kilometr uzaqlıqta eşitilgen eken. Gece ücümi sebebinden reyd qapatıldı, lâkin sabağa doğru işi başlatıldı.

«Zarar yoq», amma pencerelerge cam qoyalar

Qırımnıñ Telegram kanalları uçucısızlarnıñ Aqyarğa ücüm videolarını derc etti. Derc etilgen videolarda eki farqlı patlav bar. Bir uçucısız tüşürilgen, dep aytalar, ekincisi – patlağan eken.

Aynısını Aqyarnıñ Rusiye valisi Mihail Razvojayev de ayttı. Onıñ bildirgenine köre, gece Aqyarğa suv üstü dronlar ücüm etti – bir uçucısız yoq etildi, ekincisi «özü patladı».

Mihail Razvojayev «er şey tış reydde oldı», şunıñ içün «bir obyekt zarar körmedi», dep bildire.

Amma bu versiya Telegram kanalları tarqatqan patlav videolarına zıt kele. Anda patlavnıñ tış reydde degil, şeerde olğanı körüne.

Aqyardaki gece patlavlarınıñ aqibetleri olğan açıq menbalardaki fotoresimlerde yalıdaki evlerde qırılğan pencereler ve bozulğan reklama aydınlatuvları körüne, yañı qurulğan binada ise patlav dalğasından balkon qapu ve pencereleri açıldı.

Rusiye kütleviy haber vastaları Rusiye Mudafaa nazirliginiñ malümatına esaslanıp, Aqyarnıñ «bazı binalarında» camlar qırıldı ve «ücümlerniñ aqibetleri yoq etile», yerli akimiyetke ise «zararnı esaplap yoq etmege» vazife berildi, dep bildire.

Kütleviy haber vastaları binalar zarar körgenini bildirgen soñ Mihail Razvojayev de bunı tanıdı. O, yoq etilgen duşman deñiz uçucısızlarınıñ patlavlarından «dört mesken evniñ camları qırıldı», dep ayttı.

«İdariy şirketler operativ hızmetlernen beraber Streletskaya körfezindeki evlerge kirip baqalar. Camlar endi qoyula», – dep bildirdi o.

Eki degil, üç uçucısızmı?

Rusiye Mudafaa nazirligi Qara deñiz flotunıñ yerine ücüm etken eki degil, üç kater aqqında bildirdi. Amma Aqyar körfezine yaqınlaşqanda olar yoq etildi, dep aytıla.

Strategik Qara deñiz tedqiqatları institutınıñ reberi Andriy Klımenko tahqiqat neticelerine köre suv üstü dron «Streletskaya körfezine keçken», dep bildire.

«Tahminen binalar qarşısında patladı – Aqyar alet quruluv institutınıñ yataqhane ve oquv korpusları qarşısında. Streletskaya körfezinde suv rayonınıñ qaravul gemileri buluna», – dedi o.

Rusiye Mudafaa nazirligi adisede Ukrayına ordusını qabaatladı.

Ukrayına akimiyeti ve Ukrayına Silâlı quvetleri patlavlarğa alâqaları olğanını şimdilik bildirmedi.

«Qırımda ava telükesi signalına alışsınlar»

Ukrayına Silâlı quvetleriniñ spikeri Yuriy İgnat Ukrayına milliy telemarafonınıñ yayınında suv üstü dronlar «tüşürilmesi zor olğan» qıyın bir nişan ola, dep qayd etti.

«Suv üstünde areket etken adiy uçucısızlar – qolay bir nişan degil, tüşürilmesi küçtir. Şunıñ içün uçucısızlar qullanılğan uruş vastaları arttırılacaq», – dedi o.

Qara deñizge qarşı ücümlerniñ mantığını ISW Amerika cenkni tedqiq etüv institutı añlattı. Ekspertleriniñ malümatına köre, Rusiye Qara deñiz flotunıñ gemilerini Ukrayına cenübinde Ukrayına Silâlı quvetleriniñ qarşı ücümini keri qaytarmaq içün qullana bile.

«Doğru darbe imkânları ceetinden altı desant gemisi pek müim ola, çünki qarada ücüm etmek içün raketa komplekslerini taşıy. Qara deñiz flotunıñ Qara deñizde körvet, tralşçik, qayıqlarğa qarşı gemi, raketa katerleri ve desant gemileri bar. Lâkin Ukrayına cenübinde Ukrayına Silâlı quvetleriniñ qarşı ücümine qarşı mudafaa üstünligini temin etip olamazdır, çünki darbe endirmek içün yalığa bayağı yaqınlaşmağa kerek olacaq, bu da olarnı yalı topları içün qolay nişan yapar», – dep aytıla Cenkni tedqiq etüv institutınıñ aprelniñ 23-ndeki esabatında.

Ekspertler aynı vaqıtta flot qaradaki operatsiyalarğa tesir eteceginden şübhelene, çünki Rusiye gemileri daa çoq ava, gemi ve qayıqlarğa qarşı vazifeler içün bar, ve maşnalı ücüm operatsiyaları içün kerek olğan silânı çoq taşımay.

Ukrayına cenübi quvetleriniñ birleşken koordinatsion matbuat merkeziniñ yolbaşçısı Natalâ Ğumenük Qırımdaki Rusiye akimiyeti ava telükesi signalına alışmaq kerek, çünki eñ yaqın vaqıtta regionda yañı-yañı patlavlar olacaq, dep tenbiledi.

Onıñ aytqanına köre, Qırımda şimdiki sezon «tek kurort degil, «pamuq» (ukrayın tilinde pamuq sözü patlav sözüniñ manasını da taşıy) mevsimi» dep ilân etildi.

«Şunıñ içün ava telükesi signalına alışsınlar», – dedi Ğumenük.

Qırımda yer üstü pekitüvler, hususan plâjlardakilerni aytıp, Natalâ Ğumenük «plâjlarğa qadar ketmeyceklerdir, «qum oyunları ise biter», dep qayd etti.

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.