Aqyarda oktâbr 18-inde aqşam doquz qatlı evde yanğın oldı. Rusiye FVN-niñ ilhaq etilgen Aqyarda idaresi bildirgeni kibi, adise Borisa Mihaylova soqağında oldı, bir kvartiranıñ penceresinden tütün çıqa edi.
Qurtarıcılarnıñ malümatına köre, üçünci qattaki kvartira yana edi. Vaqia yerinde zararlanğan qadın bar edi, onı yanğından temiz avağa çıqarıp, ekimlerge berdiler.
Beyanatqa köre, yanğın 15 kvadrat metrni qapladı.
Yılnıñ başından berli Qırımda umumen 4254 yanğın söndürildi, 62 adam elâk oldı, 751 adam tahliye etildi, 93 adam qurtarıldı. Qurtarıcılar, keçken yılğan köre, yanğınlarda zarar körgen adamlarnıñ sayısı 60%-ga arttı, dep bildire.
Qırımda yüksek yanğın telükesi içün oktâbr 17-19-ında acele ihtar ilân etildi.
