Aqyarda COVID-19dan daa beş esli-başlı hasta öldi. Bu aqta şeerniñ Rusiye ükümeti haber ete.
Ölgenler 72 yaştan 84 yaşqa qadar adamlar. Yanvarnıñ 28 sabası itibarınen episi olıp 98 yañı koronavirus hastası qayd etilgen. Pandemiya başlağanından berli Aqyarda 9401 kişi hastalanğan, 8481 tedaviylengen ve 381 ölgen.
Berilgen malümatqa köre, COVID-19 diagnozı tasdıqlanğan 343 insan hastahanelerde yata, alı yengil hastalar bölüginde 103 kişi buluna, 660 – közetile.
1742 insanğa COVID-19 aşısı yapıldı, 667 kişi ekinci kere aşı oldı, şimdi oca ve tibbiyet hadimleri aşılana.
Hatırlatamız ki, Qırımda keçken künü 181 yañı koronavirus hastası qayd etildi, aynı zamanda 14-niñ hastalıq alâmetleri yoq edi. Bir künde koronavirus yuqunçından 8 hasta öldi, pandemiya başlanğandan berli ise 737 adam.
Qırımda koronavirus yuqunçından vefat etkenlerniñ sayısı yüksek qala, dep qayd ete Rospotrebnadzor.
Keçenlerde Qırımnıñ başlıqları koronavirus pandemiyası sebebinden qışnıñ soñunace korporativler ve eglence tedbirlerniñ keçirilüvini yasaq etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
