Aqyarda umumen 135 koronavirus hastası bar, bir künde üç yañı adise qayd etildi. Bunı şeerniñ rusiyeli ükümetiniñ matbuat hızmeti bildirdi.
"Patsiyentler evel hasta olğan adamlarnen qonuşqan edi. Yılnıñ başından berli Aqyarda umumen 65 adam yahşı oldı, eki adam öldi. Şimdilik infektsiya hastahanesinde - 82 adam, 9-ıncı şeer hastahanesinde - 91, yaşağan yerlerinde - 815 adam nezaret etile", - denile beyanatta.
Şeerde observator rejiminde "İzumrud" pansionatı ve Omega körfezinde ve Belbekte Rusiye Mudafaa Nazirliginiñ inşaat şeerleri çalışa.
Qırımda keçken künü 14 yañı koronavirus hastası qayd etildi.
Böylece, Qırımda 259 koronavirus hastası qayd etildi. 24-ü çetelden keldi, 21-i Rusiyeden, 87 insan tüzelip yahşı oldı. Eki insan vefat etti, daa ekisiniñ ölüm sebebi belli degil, amma COVID-19 diagnozı qoyulğan edi. Aqyarda 132 koronavirus hastası qayd etildi, eki hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
