Qırımda keçken künü 14 yañı koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov COVID-19 ile küreş operativ ştabınıñ toplaşuvında.
Onıñ aytqanına köre, hastalarnıñ ekseriyeti Saqta qayd etildi.
Rospotrebnadzor idaresiniñ yolbaşçısı Natalya Penkovskaya qayd etkenine köre, Saqta artıq belli olğan merkezde - Saq rayon hastahanesinde beş adam ve Saq rayonından eki adam hastalandı.
"Kezlevde eki adise qayd etildi. Bu Moskovağa anda tedaviylenmek içün barğan qorantadır. Olar andan qaytqan soñ respirator infektsiya ile Kezlevge qaytıp hastahanege bardılar. Testlevden soñ hastahanege qoyuldılar. Daa bir qadın Kefede hastalandı, o da Moskovadan qayttı", - dedi Penkovskaya.
Onıñ aytqanına köre, daa birer adise Aqmescit ve Yaltada tasdıqlandı, bu - evelleri koronavirus hastalarınen qonuşqan adamlardır. Daa bir hasta - Bağçasaray rayonında.
Böylece, Qırımda 259 koronavirus hastası qayd etildi. 24-ü çetelden keldi, 21-i Rusiyeden, 87 insan tüzelip yahşı oldı. Eki insan vefat etti, daa ekisiniñ ölüm sebebi belli degil, amma COVID-19 diagnozı qoyulğan edi. Aqyarda 132 koronavirus hastası qayd etildi, eki hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
