Sentâbrniñ 29-ı sabasına Aqyarda 21 yañı COVID-19 hastası qayd etildi, dep bildire şeerniñ Rusiye ükümeti.
«Hastalar – 36 yaşından 84 yaşına qadar insanlar, episi – yerli sakin. 21 insan tüzelgen soñ yiberildi», – dep bildirile haberde.
Akimiyetniñ malümatına köre, al-azırda 281 insan hastahanelerde buluna, 240 kişi yuqunç hastahanesinde közetile, №9 şeer hastahanesinde 203 insan buluna, 390 kişi yaşağan yerde közetile.
Yılnıñ başından Aqyarda 990 insan yañı koronavirus yuqunçına oğradı, 637 kişi tüzeldi, 27 insan vefat etti.
İşğal etilgen Qırımnıñ Rusiye yolbaşçısı Sergey Aksenovnıñ bildirgenine köre, sentâbrniñ 29-nda saba qayd etilgen 87 yañı koronavirus hastası aqqında haber etildi. Umumen Qırımda 4474 COVID-19 hastası qayd etildi, 2780 insan tüzeldi, 62 hasta vefat etti.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
