İyün 12-sinde Aqyarda eki yañı koronavirus hastası tasdıqlandı, bildire şeerniñ rusiyeli akimiyetiniñ matbuat hızmeti.
Qayd etilgenine köre, ekisiniñ de evel hasta olğan adamlarnen alâqası oldı.
Qırımda iyün 12-sinde 22 yañı koronavirus infektsiyası qayd etildi.
Akimiyetniñ malümatına köre, Qırım ve Aqyarda 512 koronavirus hastası qayd etildi. 137 adam Qırım hastahanelerinde tedaviylene, 361 adam yahşı olıp hastahaneden çıqtı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
