Aqyarda eki künden berli yañı COVID-19 hastaları qayd etilmey.
Şeerniñ Rusiye ükümeti bildirgenine köre, 100 insan yuqunç hastahanesinde buluna, 93 kişi – №9 şeer hastahanesinde. 960 insan yaşağan yerinde közetile. İyünniñ 9-nda keçiş noqtalarında 315 insannıñ testi yapıldı.
«İzumrud» pansionatı observator rejiminde çalışa.
Yılnıñ başından Aqyarda 177 insan koronavirus yuqunçına oğradı, 150 kişi tüzeldi, 3 insan vefat etti.
Qırımda keçken künü daa bir koronavirus hastası qayd etildi – Aqmescitte. COVID-19 diagnozı tasdıqlanğan qadın vefat etti.
Qırımda 458 koronavirus hastası qayd etildi, 33-ü çetelden keldi, 86-sı qomşu Rusiyeden kelgen ve olarnen alâqada olğan insanlardır. 338 insan tüzeldi, 15 hasta vefat etti. Aqyarda 177 insan COVID-19 hastalığına oğradı. 145 kişi tüzeldi, üç insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
