Qırımda keçken künü daa bir koronavirus hastası Aqmescitte qayd etildi. COVID-19 hastalığına oğrağan bir qadın vefat etti. Bu aqta Aqmescitte er kün yapılğan brifingde haber etildi.
«№7 Aqmescit şeer hastahanesiniñ reanimatsiyasında bulunğan qadın vefat etti – yañı koronavirus yuqunçı diagnozı qoyulğan edi. Eki taraflı pnevmoniya ve hronik hastalıqlarnıñ ağırlaşuvı oldı. Yedi kişi ağır alda buluna, yedi insan – reanimatsiyada», – dep tarif etti Rusiye kontrolindeki Qırım Sağlıq naziriniñ muavini Anton Lâskovskiy.
Onıñ malümatına köre, Qırımda 2881 insan tibbiy közetüv altında buluna, 945 kişi observatorlarğa alındı.
Qırımda 458 koronavirus hastası qayd etildi, 33-ü çetelden keldi, 86-sı qomşu Rusiyeden kelgen ve olarnen alâqada olğan insanlardır. 338 insan tüzeldi, 15 hasta vefat etti. Aqyarda 177 insan COVID-19 hastalığına oğradı. 145 kişi tüzeldi, üç insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
