Mayısnıñ 1-inde saba Aqyarda daa bir COVID-19 adisesi qayd etildi, bildire şeerniñ matbuat hızmeti.
"Bu adam evel hasta olğan adamnen alâqada edi. Umumen yılnıñ başından berli Aqyarda 85 adise tasdıqlandı, 10 adam yahşı oldı, bir adam öldi. Şimdilik infektsiya hastahanesinde 143 adam nezaret altında buluna, №9 şeer hastahanesinde - 66 adam. Yaşağan yerlerinde 1128 adam közetile", - denile beyanatta.
Müessise qayd etti ki, observator kibi "İzumrud" pansionatı ve Rusiye Mudafaa nazirliginiñ Omega körfezinde ve Belbekte olğan inşaatları. "İzumrud" pansionatında 80 adam bar, qurucılıq meydanlarında 704 adam observatsiyada buluna.
Daa evel rusiyeli Qırım başı Sergey Aksönov bildirgeni kibi, aprelniñ 30-ında Qırımda sekiz yañı koronavirus adisesi qayd etildi, böylece umumen 100 adise oldı.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
