Avgustnıñ 10-nda saba Aqyarda yerli eali arasında beş yañı COVID-19 hastası qayd etildi, dep bildire şeerniñ Rusiye ükümeti.
«Eki hasta – pensioner, üçü – orta yaşlarında insanlar. Hastalardan biri Mirnıy qasabasında raatlanğanda hastalandı, daa bir kişi bundan evel hastalanğan insannen alâqada olğan edi. Qalğanlarınıñ hastalanğan yeri ögrenile, epidemiologik tahqiqat keçirile», – dep aytıla haberde.
Akimiyetniñ malümatına köre, al-azırda 52 insan hastahanede buluna, 170 kişi yuqunç hastahanesinde közetile, 114 insan №9 şeer hastahanesinde yata, 365 kişi yaşağan yerinde közetile.
Yılnıñ başından Aqyarda 386 insan yañı koronavirus yuqunçına oğradı, 312 kişi tüzeldi, 11 kişi vefat etti.
Qırımda keçken künü 48 koronavirus hastası qayd etildi. Akimiyetniñ malümatına köre, Qırımda 1517 yañı koronavirus hastası qayd etildi. 78-i çetelden keldi, 112-si qomşu Rusiyeden kelgenler ve olarnen alâqada olğanlar. 1054 insan yahşı oldı, 17 hasta koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
