Qırımda keçken künü 48 koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov. Bir künde qayd etilgen hasta sayısınıñ yañı antirekordı oldı. Soñki sefer eñ çoq hasta keçken afta qayd etilgen edi – 39 kişi.
«Avgustnıñ 9-nda Qırım Cumhuriyetinde 48 koronavirus hastası qayd etildi. 17-si tibbiy yardım içün muracaat etkende belli oldı, 28-i daa evel qayd etilgen hastalarnen alâqada oldı, 3-ü sağlam insannıñ skriningi neticesinde belli oldı», – dep aytıla Aksenovnıñ Facebook saifesindeki haberinde.
Böyle malümatnı saba Qırımnıñ Rusiye sağlıq nazirligi de derc ete.
Akimiyetniñ malümatına köre, Qırımda 1517 yañı koronavirus hastası qayd etildi. 78-i çetelden keldi, 112-si qomşu Rusiyeden kelgenler ve olarnen alâqada olğanlar. 1054 insan yahşı oldı, 17 hasta koronavirustan vefat etti.
Aqyarda 381 insan koronavirus yuqunçına oğradı, 312 kişi tüzeldi, 11 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
