Dekabrniñ 9-nda saba Aqyarda 74 yañı COVID-19 hastası qayd etildi, dep bildirdi şeerniñ Rusiye ükümeti.
«33 insan yuqunç, doquzıncı ve birinci şeer hastahanelerine alındı, qalğanları ambulator tedaviylevde buluna. 63 yaştan 79 yaşqa qadar beş insan vefat etti», – dep aytıla haberde.
Akimiyetniñ malümatına köre, hastalar – doquz aydan 80 yaşqa qadar insanlar.
«Umumen yılnıñ başından Aqyarda 4987 kişi yañı koronavirus yuqunçına oğradı. 4582 insan tüzeldi, 153 kişi vefat etti. Bugünki künde 225 insan hastahanede buluna», – dep aytıla haberde.
127 kişi ambulator tedaviylevde buluna, 580 insan közetile, 105 kişi tüzelgen soñ hastahaneden yiberildi.
Keçken künü Qırımda 278 koronavirus hastası qayd etildi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, yılnıñ başından yarımadada hastahaneden tış pnevmoniya sayısı 300% arttı, koronavirus hastalarınıñ sayısı ise avgust ayına köre 13 qat arttı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
