Yılnıñ başından Qırımda hastahaneden tış pnevmoniya sayısı 300% arttı, dep bildirdi Qırım ve Aqyardaki Rospotrebnadzor idaresiniñ reberi Natalya Penkovskaya dekabrniñ 9-nda.
«Yılnıñ başından pnevmoniya sayısı artmağa devam ete. Soñki eki aftada hastahaneden tış pnevmoniya sayısı artmağa devam ete. Qayd etilgen adiselerniñ 26%-ı covid, bakterial pnevmoniya – 16%. Qalğan qısmı – çezilmegen pnevmoniyalar», – dedi o, koronavirus yuqunçınıñ tarqaluvı ile küreş operativ ştabınıñ toplaşuvında.
Penkovskayanıñ daa evel bildirgenine köre, avgust ayına baqqanda yarımadada koronavirus hastalarınıñ sayısı 13 qat arttı. Qırımnıñ Rusiye yolbaşçısı Sergey Aksenov, yarımadada koronavirus yuqunçınıñ tarqaluv vaziyeti fenalaşa, dep qayd etti.
Keçken künü Qırımda 278 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
