Noyabrniñ 12-nde saba Aqyarda 55 yañı COVID-19 hastası qayd etildi. 22 hasta yuqunç ve doquzıncı şeer hastahanesine alındı, qalğanları ambulator tedaviylevde buluna, dep haber ete şeerniñ Rusiye ükümeti.
«Hastalar – 17 yaşından 93 yaşına qadar yerli sakinler. 152 kişi tüzelgen soñ hastahaneden yiberildi. 62 ve 73 yaşlarında er adamları, 79 ve 93 yaşında qadınlar vefat etti», – dep aytıla haberde.
Yerli akimiyetniñ malümatına köre, yılnıñ başından Aqyarda 3306 insan yañı koronavirus yuqunçına oğradı. 2298 kişi tüzeldi, 87 insan vefat etti.
Berilgen malümatqa köre, bugünki künde COVID-19 diagnozı tasdıqlanğan 323 insan hastahanede buluna.
Keçken künü Qırımda 220 koronavirus hastası qayd etildi. Pandemiya vaqtında 11584 Covid-19 hastası qayd etildi, 7406 insan tüzeldi, 194 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
