Aqyarda sentâbrniñ 28-nde 23 yañı COVID-19 hastası qayd etildi, bir hasta vefat etti. Bu aqta şeerniñ Rusiye ükümetiniñ matbuat hızmeti bildire.
Qayd etilgenine köre, hastalar – 12 yaşından 94 yaşına qadar insanlar, esasen yerli sakinler. Eki insan tüzelgen soñ hastahaneden yiberildi. 82 yaşında er adamı vefat etti. Onıñ hronik hastalıqlarnen beraber eki taraflı pnevmoniyası oldı.
Yılnıñ başından Aqyarda 969 insan yañı koronavirus yuqunçına oğradı. Al-azırda 286 insan hastahanede buluna. 616 insan tüzeldi, 27 kişi vefat etti. Bugünki künde 238 insan yuqunç hastahanesinde közetile, 225 kişi №9 şeer hastahanesinde buluna. 385 insan yaşağan yerde közetile. «İzumrud» ve «Solnışko» pansionatları observator rejiminde çalışa.
Hatırlatamız, sentâbrniñ 27-nde Qırımda 82 koronavirus hastası qayd etildi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
