İyülniñ 6-nda saba Aqyarda dört yañı COVID-19 hastası qayd etildi, dep bildire Rusiye kontrolindeki Aqyar ükümeti.
Akimiyetniñ malümatına köre, insanlar daa evel hastalanğanlarnen alâqada olğanlar.
«Yahşı olğan daa dört kişi çıqarıldı. Yılnıñ başından Aqyarda 249 insan yañı koronavirus yuqunçına oğradı. Al-azırda 43 kişi hastahanede buluna. 193 insan tüzeldi, 5 kişi vefat etti», – dep aytıla haberde.
Qayd etilgenine köre, bugün şeerniñ yuqunç hastahanesinde 138 insan közetile, 87 kişi №9 şeer hastahanesinde yata, 910 insan yaşağan yerinde közetile.
İyülniñ 6-nda aman-aman üç afta içinde ilk sefer Qırımda yañı COVID-19 hastaları qayd etilmedi.
Tünevin Qırımda 38 COVID-19 hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
