Aqyarda yanvarniñ 29-nda COVID-19 diagnozı qoyulğan daa dört esli-başlı hasta vefat etti. Bu aqta şeerniñ Rusiye ükümeti haber ete.
Umumen bir künde 99 yañı COVID-19 hastası qayd etildi. Tüzelgen 85 kişi yiberildi. 71 yaştan 96 yaşqa qadar drt insan vefat etti.
Pandemiya başlağanından, akimiyetniñ malümatına köre, Aqyarda 9500 kişi yañı koronavirus yuqunçına oğradı. 8566 insan tüzeldi, 385 kişi vefat etti. COVID-19 diagnozı tasdıqlanğan 354 kişi hastahanelerde buluna. Alı ağır olmağan hastalar bölüginde 108 kişi yata.
641 insan közetile – olar hastalarnen alâqada oldı, amma COVID-19 diagnozları tasdıqlanmadı, dep qayd etti Aqyar ükümeti.
Rospotrebnadzor, Qırımda koronavirus yuqunçından vefat sayısı yüksek qala, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
