Aqyarda dekabrniñ 17 sabası itibarınen 76 yañı COVID-19 hastası qayd etildi, 74 yaştan 88 yaşqa qadar beş hasta öldi. Bu aqta şeerniñ Rusiye ükümeti zaber etti.
“39 kişi yuqunç, doquzıncı ve şeer hastahanelerine alındı, qalğanları ambulator tedaviylevde buluna. Hastalar – beş yaştan 83 yaşqa qadar insanlar. 93 adam tüzelgen soñ hastahaneden çıqarıldı”, – dep yazıla haberde.
Berilgen malümatqa köre, umumen yılnıñ başından Aqyarda 5602 insan yañı koronavirus yuqunçına oğrağan. 5233 insan tedaviylengen, 185 ölgen. 160 hasta statsionarlarda, 12 ambulator tedaviylevde, 575 nezaret astında buluna.
Pandemiya başlağanından berli Qırımda resmiy şekilde 20339 hasta qayd etilgen, 15611 tüzelgen ve 400 ölgen.
Keçende Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
