Aqyarda sentâbrniñ 24-nde saba 23 yañı COVID-19 hastası qayd etildi. Bu aqta şeerniñ Rusiye ükümeti haber ete.
Berilgen malümatqa köre, 13 yaşından 92 yaşına qadar insanlar hastalandı, 21-i yerli sakin ve ekisi kelgen kişi. 15 insan tüzelgen soñ hastahaneden çıqarıldı.
Yılnıñ başından Aqyarda 888 insan yañı koronavirus yuqunçına oğradı. Al-azırda 234 insan hastahanelerde buluna. 583 kişi yahşı oldı, 25 insan vefat etti.
Bugünki künde 217 insan yuqunç hastahanesinde, 204 kişi №9 şeer hastahanesinde közetile. 461 kişi yaşağan yerde közetile. «İzumrud» ve «Solnışko» pansionatları observator rejiminde çalışa.
Qırımda keçken künü eki hasta koronavirus yuqunçından vefat etti. Keçken künü Qırımda 81 COVID-19 hastası qayd etildi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
