Mayısnıñ 14-ü sabasına Aqyarda eki yañı COVID-19 hastası qayd etildi. Bu aqta şeerniñ Rusiye ükümetiniñ matbuat hızmeti bildire.
«Hastalar daa evel hastalanğanlarnen alâqada olğan edi ve epidemiologik tahqiqat çerçivesinde observatsiyada bulunğan edi», – dep aytıla haberde.
Qayd etilgenine köre, 85 insan yuqunç hastahanesinde buluna, №9 şeer hastahanesinde 94 kişi qala. 741 insan yaşağan yerinde közetüv altında buluna.
Akimiyetniñ malümatına köre, mayısnıñ 14-ne qadar Aqyar hastahanelerinden 22 insan çıqarıldı, yılnıñ başından berli şeerde 132 koronavirus hastası qayd etilgen edi, 57 insan tüzeldi, 2 kişi vefat etti.
«İzumrud» pansionatı, Rusiye Mudafaa nazirliginiñ Omega körfezi ve Belbekteki qurucılıqlar observator rejiminde çalışmağa devam ete.
Qırımda keçken künü altı yañı koronavirus hastası qayd etildi.
Böylece, Qırımda 245 koronavirus hastası qayd etildi. 24-ü çetelden keldi, 21-i Rusiyeden, 84 insan tüzelip yahşı oldı. Eki insan vefat etti, daa ekisiniñ ölüm sebebi belli degil, amma COVID-19 diagnozı qoyulğan edi. Aqyarda 130 koronavirus hastası qayd etildi, eki hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
