Qırımda keçken künü altı yañı koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov COVID-19 ile küreş operativ ştabınıñ toplaşuvında.
«Eki kişi – Yalta, eki kişi – Aluşta, bir kişi Aqmescitte ve bir kişi – Kefede», – dedi Aksenov.
Onıñ malümatına köre, ekisi daa evel qayd etilgen yerde qırğınlıq ile küreş tedbirleri ve laborator tedqiqleri neticesinde qayd etildi. Dört hasta keskin virus yuqunçı alâmetlerinen tibbiy yardım içün muracaat etkende qayd etildi.
Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikovnıñ qayd etkenine köre, hastalarnıñ bir qısmı hastalanğan insanlarnen alâqada olğanlar, bir qısmı da Rusiyeden kelip tibbiy yardım istegenler ola.
Onıñ bildirgenine köre, hastalar arasında 14 yaşında bala bar.
Böylece, Qırımda 245 koronavirus hastası qayd etildi. 24-ü çetelden keldi, 21-i Rusiyeden, 84 insan tüzelip yahşı oldı. Eki insan vefat etti, daa ekisiniñ ölüm sebebi belli degil, amma COVID-19 diagnozı qoyulğan edi. Aqyarda 130 koronavirus hastası qayd etildi, eki hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
