İyün 19-ında saba Aqyarda daa bir koronavirus adisesi qayd etildi. Buña oğrağan adam - evel hastalanğan qadınnıñ aqayı, deyler Aqyarnıñ rusiyeli akimiyetinde.
Yılnıñ başından berli Aqyarda yañı koronavirus infektsiyasınen 196 adam hastalandı. Şimdilik 23 adam hastahanede yata. 163 ada yahşı oldı, üç adam vefat etti.
Akimiyetniñ malümatına köre, infektsiya hastahanesinde nezaret altında 88 adam yata, 9-ıncı hastahanede - 82 adam. Yaşağan yerlerinde 787 adam nezaret etile.
Tünevin ilhaq etilgen Qırımda 15 koronavirus adisesi tasdıqlandı. Olardan sekizi - Kezlev şeer hastahanesiniñ merkezinde.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
