Tünevin ilhaq etilgen Qırımda 15 koronavirus adisesi tasdıqlandı. olardan sekizi - Kezlev şeer hastahanesiniñ merkezinde. Bunı rusiyeli Qırım başı Sergey Aksönov haber etti.
Yerli Rospotrebnadzor vekili Dmitriy Krutikov qayd etkeni kibi, Kezlev şeer hastahanesinde 7 patsiyent ve 2 hadim hastalandı.
"Yaltada eki adise - bu evel qayd etilgen hastalıq merkezinen alâda olğan adam ve hastahanege infektsiya şübesinen muracaat etken daa biradam. Kefe - bir adise, hasta infektsiya şübesinen muracaat etti. Aqmescit - sakin iyün başında Leningrad vulâyetinde edi, aynıñ 10-larında Qırımğa keldi, iyün 16-sında şikâyetlernen acele yardımğa muracaat etti. Daa bie adise - Qurman rayonında", - yaza Krutikovnıñ sözlerinden "Krıminform" matbuatı.
Qırımda 590 yañı koronavirus hastası qayd etildi. 36-sı çetelden keldi, 90-ı qomşu Rusiyeden kelgenler ya da olarnen alâqada olğanlardır. 392 insan tüzeldi. Aqyarda 195 insan yañı koronavirus yuqunçına oğradı.163 insan yahşı oldı, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
