Aqyarnıñ Balıqlava belediye okrugındaki Yañı Şüli (Şturmovoye) köyünde Aqyar soq., 48 adresi boyunca aprelniñ 15-nde cami imamı Rustem Abilevniñ evinde tintüv keçirile.
Bu aqta «Qırım birdemligi» cemaat teşebbüsi Facebook saifesinde haber ete.
Qayd etilgenine köre, tahqiqat tedbirleri başta Abilevniñ imamlıq yapqan camide keçirildi, soñra uquq qoruyıcılar Rustem Abilevniñ evine keldi.
«Tedbirlerde Aqyarnıñ «İKS-TV» haber kanalı, «Rossiya 1» telekanalı ve diger Rusiye kütleviy haber vastaları buluna. Vaziyet ögrenile», – dep aytıla haberde.
Rusiye uquk qoruyıcıları bunıñnen bağlı resmiy bir izaat şimdilik bermedi. Qırım.Aqiqat tafsilâtlı malümat almağa tırışa.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqa bildirgenine köre, Qırımda tevqif etilgen 23 qırımtatar faalini Rusiyege alıp ketkenler.
