Aqyarda iyülniñ 24-nde 20 yañı koronavirus hastası qayd etildi, dep bildire şeerniñ Rusiye ükümetiniñ matbuat hızmeti.
Qayd etilgenine köre, hastalarnıñ ekseriyeti – yerli sakinler, epidemiologik tahqiqat keçirile, qaydan hastalanğanları ögrenile.
Bugünki künde 139 insan yuqunç hastahanesinde buluna, 157 kişi №9 şeer hastahanesinde yata. 548 insan yaşağan yerinde közetile.
Aqyarda 332 insan COVID-19 koronavirus yuqunçına oğradı. 64 insan hastahanede yata. 251 kişi tüzeldi, altı insan vefat etti.,
İyülniñ 24-nde Qırımda 21 koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
