İyülniñ 24-nde Qırımda 21 koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov.
Onıñ aytqanına köre, sekizi tibbiy yardım içün muracaat etkende belli oldı, 11-i daa evel hastalanğanlarnen alâqada olğan edi, eki hasta keldi.
«Qırımda 1077 koronavirus hastası qayd etildi. 69-ı çetelden keldi, 106-sı qomşu Rusiyeden kelgenler ve olarnen alâqada olğanlar, 780 tibbiy yardım içün muracaat etkenler ve qayd etilgen hastalarnen alâqada olğanlardır, 122-si sağlam insanlarnıñ laborator skriningi neticesinde belli oldı», – dep yazdı Aksenov Facebook saifesinde.
Onıñ bildirgenine köre, bir künde 1920 insan teşkerildi, umumen 820 kişi tüzeldi.
Berilgen malümatqa köre, iyülniñ 23-nde Qırımda 18 yañı COVID-19 hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
