Dekabrniñ 28 sabası itibarınen Aqyarda 81 yañı koronasirus hastası qayd etildi. Hastalar – 3 yaştan 86 yaşqa qadar insanlar, dep yazıla şeerniñ Rusiye ükümetiniñ beyanatında.
"Uumumen yılnıñ başından Aqyarda 6509 insan yañı koronavirus yuqunçına oğrağan. 6024 insan tedaviylengen, 223 ölgen", – dep haber etile.
Yerli başlıqlarnıñ malümatına köre, bugünde 197 hasta statsionarlarda, yengil hastalar içün bölükte 190 kişi yata, nezaret astında 586 buluna.
Tünevin Qırımda 343 yañı koronavirus hastası qayd etildi, sekiz hasta öldi. Pandemiya başlağanından berli Qırımda resmiy şekilde 24191 hasta qayd etilgen, 18873 tüzelgen ve 483 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
