Qırımda keçken künü 343 koronavirus hastası qayd etildi, 14-niñ hastalıq alâmetleri yoq, dep bildirdi dekabrniñ 28-nde Qırımnıñ Rusiye başı Sergey Aksönov.
"295 hasta tibbiy yardım içün muracaat etkende qayd etildi, 48 daa evel qayd etilgen hastalarnen alâqada oldı", – dep bildire Aksyonovnıñ aytqanlarını matbuat hızmeti.
Onıñ malümatına köre, bir künde tedaviylengenlerniñ sayısı 457 oldı, bütün vaqıt devamında 18 873 kişi tüzelgen.
Qırım Sağlıq saqlav nazirliginiñ er künki monitoringine köre, tünevin bu yuqunçtan 8 adam ölgen, pandemiya başlanğandan berli ise 483.
"3340 kişi ambulator tedaviylevde (covid), 2966 kişi hastahanelerde (covid ile pnevmoniya), 7 kişi observatorlarda buluna", – yazıla bildirmede.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
