Oktâbrniñ 27-nde saba Aqyarda 62 yañı COVID-19 hastası qayd etildi, dep bildire şeerniñ Rusiye ükümeti.
«35-i yuqunç ve doquzıncı şeer hastahanesine alındı, 27 insan ambulator tedaviylede buluna. Hastalar – 19 yaşından 82 yaşına qadar yerli sakinler», – dep aytıla haberde.
Akimiyetniñ malümatına köre, yılnıñ başından Aqyarda 2099 insan yañı koronavirus yuqunçına oğradı, 1364 kişi tüzeldi, 58 insan vefat etti.
Berilgen malümatqa köre, Aqyar hastahanelerinde COVID-19 diagnozı tasdıqlanğan 243 insan buluna, 354 kişi ambulator tedaviylevde buluna, 414 kişi közetile.
Keçken künü Qırımda 146 yañı koronavirus hastası qayd etildi. Umumen Qırımda 8533 COVID-19 hastası qayd etildi. 3587 insan tibbiy müessiselerde tedaviylene, 123 hasta vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
