Noyabrniñ 23-nde saba Aqyarda 58 yañı COVID-19 hastası qayd etildi. 14 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna, dep bildire şeerniñ Rusiye ükümeti.
«Hastalar – eki yaşından 88 yaşına qadar yerli sakinler. Dört kişi tüzelgen soñ yiberildi. 59, 71 ve 72 yaşlarında üç qadın vefat etti. Umumen yılnıñ başından Aqyarda 3925 insan yañı koronavirus yuqunçına oğradı», – dep aytıla haberde.
Yerli akimiyetniñ malümatına köre, 3292 insan tüzeldi, 102 kişi vefat etti. COVID-19 diagnozı tasdıqlanğan 252 insan hastahanede buluna, 253 kişi ambulator tedaviylevde qala, 599 insan közetile.
Keçken künü Qırımda 224 koronavirus hastası qayd etildi, umumen 13828 COVID-19 hastası qayd etildi, 248 hasta vefat etti.
Rospotrebnadzor, yarımadada COVID-19 hastalarınıñ sayısı dekabrniñ ortasında pek artacaq dep bekleyler, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
