İlhaq etilgen Aqyarda iyülniñ 12-nde şeerniñ yolbaşçı vazifelerini vaqtınca eda etecek Mihail Razvojayevni taqdim ettiler, dep bildire Rusiye ve Qırım kütleviy haber vastaları.
Qayd etilgeni kibi, Razvojayevni Rusiye prezidentiniñ Cenübiy federal okrugdaki vekâletli daimiy vekili Vladimir Ustinov taqdim etti.
«Mihail Vladimiroviçniñ belli bir devlet hızmeti tecribesi bar. Regional ve federal seviyede muvafaqiyetli çalışqan edi. Razvojayevniñ tecribesi devlet apparatı üzerindeki vatandaş kontrolini nasıl kerçekleştirmege mümkün olğanını köstere», – dep bildire Ustinovnıñ aytqanlarını kütleviy haber vastaları.
Razvojayevniñ qayd etkenine, onıñ içün tayin etüv büyük şeref ola, dep yaza kütleviy haber vastaları.
«Aqyarlılarnıñ işançına lâyıq olğanımıznı isbatlamaq içün bütün ğayretimni kösterecem. Bütün qararlar doğru olmalı ve şeer sakinleriniñ beklevine uymalı», – dep bildire Razvojayevniñ aytqanlarını kütleviy haber vastaları.
Al-azırda Aqyarnıñ Rusiye ükümeti saytında bu malümat yoq.
Hatırlatamız, Rusiye prezidenti Vladimir Putin Aqyarnıñ rusiyeli başı Dmitruy Ovsânnikovnıñ istifağa çıqmasını qabul etti, şeer başı vazifelerini vaqtınca Mihail Razvojayev eda etecek.
Dmitriy Ovşannikov Aqyar valisi olaraq 2017 senesi sentâbrniñ 10-unda Rusiye «saylavlarında» saylanılğan edi. 2016 senesi iyülniñ 28-inden saylanmasına qadar Aqyarnıñ rusiyeli valisi vazifelerini vaqtınca eda ete edi. Bundan evel, 2015-2016 yılları o, Rusiye sanayı ve ticaret naziriniñ muavini edi.
Belli olğanı kibi, 2018 senesi noyabr ayından başlap Rusiyedeki Krasnoyarskta doğma Razvojayev Umumrusiye halq cebesiniñ Merkeziy ştabına saylanğan edi. 2018 senesi dekabrniñ 17-den başlap ise Umumrusiye halq cebesiniñ icra komitet reberi oldı. Yedek zabiti, leytenant. Rusiyeniñ 2-nci sınıf devlet mesleatçısı ola.
