Kreml kontrolindeki Aqyar yolbaşçısı Dmitriy Ovsânnikov kimligi belli olmağanlar tarafından viran etilgen Ekinci cian cenkinde elâk olğan qırımtatarlarnıñ abidesini ğayrıdan tiklemege emin etti.
«İnterfaks» Rusiye agentligi Aqyar ükümetiniñ matbuat hızmeti bergen malümatqa esaslanıp, granit tahtalarını şeer hocalığınıñ departamenti ğayrıdan tikleycek, dep bildirdi.
Mayısnıñ 9-nda Aqyarnıñ Nahimov rayonındaki Mamaşay (Orlovka) köyünde kimligi belli olmağanlar Ekinci cian cenkinde elâk olğan qırımtatarlarnıñ hatırasına bundan üç kün evelsi tiklengen abideni viran etti.
Qırımtatar Milliy Meclisiniñ reisi Refat Çubarovnıñ fikirince, viran etilgen hatıra tahtaları «Rusiyeniñ Ekinci cian cenkindeki zafer miflerini ve monopoliyasını red etken edi».
Aqyardaki Rusiye İç işler nazirliginiñ idaresi Nahimov rayonınıñ Mamaşay (Orlovka) köyünde abideniñ viran etilmesinen bağlı (Rusiye Ceza kodeksiniñ 214-ünci maddesi 1-inci qısmı) cinaiy dava açtı.
Rusiye işğal etken Qırımda 2014 senesinden soñ «Zafer künü» sovet ve Rusiye bayramı Qızıl Ordu ve sovet halqınıñ natsist Almaniyanı yeñgen bayramı olaraq qayd etilmekte. Ukrainada mayısnıñ 8-nde Hatıra ve barışıq künü qayd etilmekte, mayısnıñ 9-nda – Ekinci cian cenkinde natsizmni yeñüv künü.
