Qırımnıñ eñ “rus” şeeri Aqyar, yarımadanıñ Rusiyege “qoşulğanınıñ” beş yıllığını, Putin kelmezden evel qutlap başladı
Ondan evel Qırımnı Rusiye Devlet Dumasınıñ mebusları ziyaret etti. Aleksandr “Hirurg” Zaldostanovnıñ yolbaşçılığında “Gece qaşqırları” (“Noçnıye volki”) motoklub da öz tedbirini keçirdi. Şeer soqaqlarında yürgen mototsikllerniñ gürültisinde balalar, şeerde numayış etilgen arbiy tehnikağa tırmaşıp çıqa edi. Rosgvardiyanıñ baqımı altında qora boyu yüzlerce aqyarlılar Rusiye bayraqlarını yelpiretip, quvançnı ifade ete edi. Soqaq bayramları “Qırım baari” tarafdarlarını topladı; basqığa oğrağan qırımtatar ve ukrain faalcileri kibi ilhaqnı selâmlamağan adamlarnıñ ise anda işi yoq edi.
İlhaq neticesinde, başqa şeerlerge köre, maddiy taraftan eñ çoq zarar Aqyar kördi. Budjetke Qara deñiz flotundan kelir yoq, deñizciler ise endi “evdeler” ve “çetelde” hızmet etkenleri içün qoşma aylıq almaylar. İlhaqtan beş yıl keçkeninden soñ, vaziyetten memnün olmağanlarnıñ sayısı arttı. Adamlar şeerlerdeki “büyük qurulışqa”, tereklerniñ yoq etilmesine ve memurlarnıñ lâqaytlığına şikâyet ete. “Ukraina vaqtında yapılğanını, şimdi daa beter yapıla”, - dep qayğıra aqyarlılar. Amma olar Nahimov meydanına kelip, Rusiye bayraqarını sallay, ilhaqqa “mücize” deyler ve, 2014 senesi aynı bu meydanda “referendum”dan soñ neticelerini hatırlap, duyğulanıp, ağlap da yibereler. “Er saat saylav neticelerini ilân ete ediler”, - deyler olar.
Aqyarlılar, “Rusiyege Qırımda ğalebe ketirgen” olar edi dep tüşüne. Bunen ğururlanalar ve bu yararlıqta şübelengenlerge - Qırım akimiyet başı Sergey Aksönov olsunmı, “Hirurg” baykerimi -darılalar. Esli-başlı qadın, “qoşuluv” ilân etilgende ağlağanını aytıp bere: “Sanki meni, vokzalda coyulğan balanı, anam tapqan”. Başqaları, yerli akimiyet “Aqyarda Rusiyege hainlik yaptı”, “mototsiklli qorqaqlarğa bedava topraq berilgen, aqyarlılarğa ise çalışmağa yer yoq” dep ayta, amma “Ukraina vaqtında bitaylar ukraince retsepni oqıp olamağanı” içün, “Qırım baari”ne quvanalar. İlhaq ketişatı, masal ve kerçekleri eñ yahşı tamam Aqyarda körünedir.
Aqyarlılar, soqaqlarğa çıqqan “Qırım baari”niñ tarafdarları - Anton Naumükniñ filminde.
Filmde, Rusiye ilhaq etken Qırım yarımadasında qullanılğan ıstılaat işletile
