Ruisye nezaretindeki Aqyar (Sevastopol) parlamentiniñ mebusları, şeerniñ rusiyeli akimiyeti teklif etken "Bayraq aqqında" ve "Tamğa aqqında" qanun leyhalarına kene qol tutmadılar.
"9 aynıñ devamında gubernator teklif etken "Bayraq aqqında" ve "Tamğa aqqında" qanun leyhaları baqılmay", - debile Aqyar ükümetiniñ beyanatında.
Ükümette, mebuslar, bu meselede şeer başı Dmitriy Ovsânnikovğa qarşı çıqalar, dep sayalar.
Aqyar parlamentiniñ saytında, "bu mesele boyunca mebuslarnıñ fikirleri türlü oldı ve qanun leyhasına qoltutılmadı", dep yazılğan.
Bazı mebuslar, sovet tamğasına ve, demek ki, qanun leyhasına, qol tuttı, başqaları ise, böyle qararlarnı şeer sakinleri almaq kerek, dep tüşüne. "Aqyar şeeriniñ tamğası aqqında" qanun leyhası boyunca böyle rey berdiler: 8 - qol tuttı, 11 - bitaraf qaldı. Vesiqanı qabul etmediler.
Aqyarnıñ (Sevastopol) rusiyeli başı Dmitriy Ovsânnikov, şeer parlamentiniñ nevbetten tış plenar oturışını çağırtqan edi. Oturış iyül 9-ında saat 16:00 keçirilecek edi. Rusiye nezaretindeki Aqyar parlamentiniñ mebusları, eki mevzunı muzakere etecek edi: "Aqyar şeeri tuğrası aqqında" Aqyar şeeriniñ qanun leyhası ve "Aqyar şeeri bayrağı aqqında" Aqyar şeeriniñ qanun leyhası.
