№4 Aqyar şeer hastahanesi “Lazur” pansionatı esasında koronavirus yuqunçınen hastalarnı tedaviylemek içün statsionar donatıldı.
Aqyarnıñ Rusiye ükümetiniñ matbuat hızmetiniñ haber etkenine köre, müessise birden 105 kişi qubul ete bile.
Yanvarnıñ 2 itibarınen bölükte 38 adam bulunmaqta.
“Yañı statsionar ile beraberlikte COVID-19 ile hastalarnı tedaviylemek içün 1165 yer bar. Tibbiy yardım hastalarğa №9 şeer yuqunç hastahanesinde, №1 şeer hastahanesinde ve “İzumrud” pansionatı esasında donatılğan blükte kösterile”, – yazıla bildirmede.
Hatırlatamız, keçken künü Qırımda 280 yañı koronavirus hastası qayd etilgen edi.
2020 yılında Qırımda 25 527 insan koronavirusqa oğradı – akimiyet.
Qırım ve Aqyardaki Rospotrebnadzor idaresi yarımadada koronavirus hastaları vefat etmege devam ete, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
