Aqyarda martnıñ soñunda koronavirusnıñ tarqalmasınen küreşmek içün şeerniñ kirişlerinde pekitilgen nezaret noqtalarını qapatalar. Bunı salı künü şeer başı Mihail Razvojayev haber etti.
"Biz iyülniñ 1-inden başlap rejimni yımşatıp olamız. Semereli işni kstergen nezaret noqtalarınıñ işini toqtata bilemiz", - haber etti Razvojayev operativ ştabnıñ oturışında.
Onıñ aytqanına köre, şeerde epidemiologiya vaziyeti stabildir: "Dinamika, biz vaziyetni nezaret ete bilgenimizni kösterdi". Amma Razvojayev qayd etti ki, martta ilân etilgen yüksek azırlıq rejimi şimdilik lâğu etilmeycek.
İyün 30-ınıñ sabasına qadar Aqyarda altı yañı koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
