Rusiye kontrolindeki Aqyar parlamentiniñ deputatları «Aqyar ve Qırım arasında sıñır» qanunını qabul etti.
Vesiqa fevralniñ 4-nde Rusiye parlamentiniñ toplaşuvında qabul etildi.
Bu qararğa bütün deputatlar qoltuttı, dep haber etile.
Yanvarniñ 20-nde Rusiye kontrolindeki Qırım yolbaşçısı Sergey Aksenov ve Aqyar ükümetiniñ yolbaşçısı Mihail Razvojayev Qırım ve Aqyar arasında «sıñır belgilev vesiqasını» imzaladı.
Davalı topraqlar sebebinden işğal etilgen Qırım ve Aqyar arasındaki sıñır alâ daa yoq, muzakereler 2017 senesi yanvar ayından berli devam ete, dep bildire Qırım kütleviy haber vastaları. Jurnalistlerniñ aytqanına köre, Qırımnıñ Rusiye akimiyeti istegeni kibi sıñırlar tasdıqlansa, Aqyar Yalta ve Bağçasaray sıñırlarında qıymetli topraqlardan marum qalması mümkün.
Davalı topraqlar tahminen 400 gektar teşkil etmekte.
2019 senesi Aqyarnıñ sabıq yolbaşçısı Dmitriy Ovsânnikov, Qırım ve Aqyar arasındaki sıñır Sovet Sotsialistik Cumhuriyetler Birliginde tasdıqlanğan sıñırlarda belgilenecek, dep bildirgen edi.
