Rusiye kontrolindeki Qırım yolbaşçısı Sergey Aksenov ve Aqyar ükümetiniñ yolbaşçısı Mihail Razvojayev Qırım ve Aqyar arasında «sıñır qoyulmasına dair vesiqanı» imzaladılar.
Bu aqta TASS Rusiye haber agentligi Razvojayevniñ malümatına esaslanıp bildire.
«Qırım ve Aqyar arasında koordinat sıñırını tasdıqladıq. Sergey Valeryeviç Aksenovnen vesiqanı Moskvada imzaladıq. Eñ yaqın vaqıtta bu paketni vesiqanıñ tasdıqlanması içün Qanun çıqarıcı mecliske yollamağa kerek. Qırımnen bağlı mesele qalmadı», – dep bildire Razvojayevniñ aytqanlarını kütleviy haber vastası.
Onıñ aytqanına köre, imzalanğan vesiqa Qırım ve Aqyar arasındaki «sıñırlarnı» tam olaraq tasvirlemekte.
Davalı topraqlar sebebinden işğal etilgen Qırım ve Aqyar arasındaki sıñır alâ daa yoq, muzakereler 2017 senesi yanvar ayından berli devam ete, dep bildire Qırım kütleviy haber vastaları. Jurnalistlerniñ aytqanına köre, Qırımnıñ Rusiye akimiyeti istegeni kibi sıñırlar tasdıqlansa, Aqyar Yalta ve Bağçasaray sıñırlarında qıymetli topraqlardan marum qalması mümkün.
Davalı topraqlar tahminen 400 gektar teşkil etmekte.
2019 senesi Aqyarnıñ sabıq yolbaşçısı Dmitriy Ovsânnikov, Qırım ve Aqyar arasındaki sıñır Sovet Sotsialistik Cumhuriyetler Birliginde tasdıqlanğan sıñırlarda belgilenecek, dep bildirgen edi.
