Deñiz uçucısızlarınıñ ücümleri Rusiye Qara deñiz flotunıñ Qara deñizdeki areketlerini tuta. Bu aqta martnıñ 27-nde Büyük Britaniya Mudafaa nazirligi aydınlatqan Britaniya istihbaratınıñ haberinde aytıla.
«Aqyar yaqınlarında soñki ücümler Rusiye arbiy gemilerine zarar ketirmegen olsa da, uçucısızlarnıñ ücüm telükesi Rusiye Qara deñiz flotunıñ areketlerini sıñırlamağa devam ete», – dep aytıla haberde.
Martnıñ 22-nde saba Qırım.Aqiqat mühbiri Aqyardaküçlü patlavlar aqqında bildirdi, soñra deñiz yolcu naqliyatı işini toqtattı. Aqyarnıñ Rusiye yolbaşçısı Mihail Razvojayev Rusiye Qara deñiz flotuna deñiz dronları ücüm etti, dep bildirdi.
Martnıñ 22-nde Qırım.Aqiqat mühbiri bildirgenine köre, Qırım ve Aqyarda radioda tahliye ve telüke signalı tevsiyeleri aytıldı. Qırımnıñ Rusiye akimiyeti ve Rusiye tarafdarı olğan blogerler bunı «bozıp açuv» dep adlandırdı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
