Oktâbrniñ 21-i sabasına Aqyarda 53 yañı COVID-19 hastası qayd etildi, dep bildire şeerniñ Rusiye ükümeti.
«Hastalar – 16 yaşından 80 yaşına qadar yerli sakinler. 73 ve 78 yaşında eki er adamı vefat etti. Ekisiniñ de hronik hastalıqlarınen beraber eki taraflı virus-bakterial pnevmoniyası oldı», – dep aytıla haberde.
Akimiyetniñ malümatına köre, yılnıñ başından Aqyarda 1743 kişi yañı koronavirus yuqunçına oğradı. 1148 kişi tüzeldi, 53 insan vefat etti.
COVID-19 diagnozı tasdıqlanğan 278 insan şeer hastahanelerinde buluna: 110 yuqunç hastahanesinde, 160 insan doquzıncı şeer hastahanesinde, sekiz kişi – Rusiye Mudafaa nazirliginiñ gospitalinde.
«95 insan ambulatoriya tedaviyisinde buluna. 404 insan közetile – hastalarnen alâqada olğanlar, COVID-19 qayd etilmedi», – dep qayd etile haberde.
Qırımda keçken künü 203 koronavirus hastası qayd etildi. Umumen Qırımda, yerli akimiyetniñ malümatına köre, 7200 insan koronavirusqa oğradı, 113 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
