Rusiye nezaretindeki Aqyar akimiyeti, iyün 1-ine qadar şeerde daa dört yañı koronavirus adisesi tasdıqlanğanını bildire.
"İyün 1-iniñ sabasına itibaren 4 yañı COVID-19 hastası tasdıqlandı. Olar daa evel yoqlanğan adamlarnen qonuşa edi ve observatsiyada bulundı. Yılnıñ başından berli Aqyarda umumen 165 adam koronavirus infektsiyasınen hastalandı", - denile Aqyarnıñ rusiyeli ükümetiniñ saytında.
Qayd etile ki, epidemiya vaqtında Aqyarda 134 adam yahşı oldı, üç adam vefat etti.
"Bugünde-bugün infektsiya hastahanesinde 81, 9-ıncı şeer hastahanesinde - 80 adam nezaret altında buluna. Yaşağan yerlerinde 582 adam baqıla. "İzumrud" pansionatı observator rejiminde çalışa", - bildirile beyanatta.
Конец самоизоляции. Как прошла первая неделя без жестких ограничений в Крыму (фотогалерея)
Qırımda tünevin eki yañı koronavirus adisesi qayd etildi - bir adise Aluştada, daa birisi ise Kezlevdedir.
Şimdilik Qırımda 387 yañı koronavirus hastası qayd etildi. 28-i çetelden keldi, 74 kişi qomşu Rusiyeden keldi. 11 insan vefat etti. Aqyarda 161 COVID-19 hastası bar, üç kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
