Link açıqlığı

Saatnıñ esas haberi

Qırımda eki yañı COVID-19 adisesi qayd etildi


Qırımda tünevin eki yañı koronavirus adisesi qayd etildi, bildire Qırımnıñ rusiyeli başı Sergey Aksönov.

Onıñ malümatına köre, hastalarnı hastahanelerge qoydılar. Rospotrebnadzor idaresiniñ mütehassısları epidemiologiya tetqiqatını keçire, hastalarnen alâqada bulunğan adamlar bilindi, olarğa qarşı profilaktika tedbirleri keçirile.

İyün 1-inde Aqmescitte matbuat konferentsiyasında Qırım ve Aqyardaki Rospotrebnadzor idaresiniñ yolbaşçısı Dmitriy Krutikov bildirgeni kibi, bir adise Aluştada, daa birisi ise Kezlevde qayd etildi.

Şimdilik Qırımda 387 yañı koronavirus hastası qayd etildi. 28-i çetelden keldi, 74 kişi qomşu Rusiyeden keldi. 11 insan vefat etti. Aqyarda 161 COVID-19 hastası bar, üç kişi vefat etti.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG