Mayısnıñ 4-nde saba Aqyarda eki yañı COVID-19 hastası qayd etildi, dep haber etile şeerniñ Rusiye ükümetiniñ saytında.
«Hastalar daa evel hasta olğanlarnen alâqada olğan edi. Umumen yılnıñ başından Aqyarda 91 hasta qayd etildi, 11 insan tüzelip hastahaneden çıqtı, 2 kişi vefat etti. Bugünki künde 139 insan yuqunç hastahanesinde közetüv altında buluna. 1501 insan yaşağan yerinde közetüv altında qala», – dep aytıla haberde.
Müessise, 89 insan bulunğan «İzumrud» pansionatı, Rusiye Mudafaa nazirliginiñ Omega körfezi ve Belbekteki qurucılıqlar observator rejiminde çalışa. 704 insan qurucılıq meydanlarında observatsiyada buluna.
Qırımda keçken künü altı koronavirus hastası qayd etildi. Böylece, Qırımda 111 koronavirus hastası bar.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
